د ژمي درې مياشتې په سړو سيمو کې کارونه او زدهکړې کمې وي، ډېر خلک وزګار وي، زه په ټولو هېواد مينو غږ کوم راځي چې پدغو دريو ماشيتو کې راتلونکي کال لپاره مړې چينې، څاګانې او کاريزونه ژوندي او د نورو اوبه ډېرې کړو. همدارنګه په راتلونکي کال کې د سيلابونو مخنيوى وکړو. دا کار په هغه سيمو کې چې ژورې څاګانې يې د کرنې د اوبو ترلاسه کولو لپاره ويستلي ډېر اړين دى.

دې چارې ته د ځمکې لاندې اوبو د سرچينو چارجکول (واټرټيبل ريچارج) وايي چې په تېرو دوو لسيزو کې په پرمختلليو هېوادونو کې ډېر عام دى، د غريزو او وچو سيمو لپاره لکه زموږ، چارج کول ډېر ګټور دي. په عکسونو کې چې ګورئ، د واورو او باران د اوبو د تمکيدو لپاره په ډاګونو، غونډيو او غرونو کې نري لښتي يا کندې (ډنډې) ويستل دي، دوى کې د اوبو تمکيدو سره :

١- د اوبو سرچينې چارج کېږي.

٢- په کندو (ډنډو)، لښتيو او شاوخوا کې ېې د څارويو لپاره واښه شنه کيږي.

٣-په زېم سره يې چينو، څاګانو، کاريزونو، ويالو او سيندونو ته وتلو سره اوبه ډېريږي.

٥- د خاورې د له منځه تللو مخنيوي کېږي.

٦- د سيلابونو مخنيوى کېږي.

٧- په هېواد کې خوراک او څښاک پريمانه کېږي.

٨- کال وروسته به پدغو لښتيواو کندو کې کرنه هم کولاى شئ.

د ټول هېواد په کچه هرڅوک يې په يوازى، ملګرو يا د کلى سره په اشر دغه ډنډې کندې او لښتي د لوبو کولو په وخت ورکولو کې ايستلاى شي، يوه ميتي يا کلنګ، بيلچې او ګرمو جامو ته اړتيا ده. هيله ده لږترلږه په اونۍ کې ٢ ساعته د دغه اشر د خبر رسولو، برخه اخيستلو او همکارۍ کولو سره هېواد اباد کړئ. دا اشر د ټولو همکارۍ ته اړتيا لري.

د لېوال ملي مړښت پروګرام اشر کې ګډون.

د ګرمو جامو، ميتى يا کلنګ او بيلچې مرسته وکړئ، موږ به ستاسې مرسته د پروګرام څخه همکارى غوښتونکو ته ورسوو. د اشر خبر او ګټې خلکو ته ورسوئ.

د پروګرام سره تخنيکي مرسته وکړئ، څېړنه وکړئ، تخنيکي مواد او تجربې د نورو ژبو څخه وژباړى او د پروګرام له لارې يې نورو سره شريک کړئ.

د لېوال ملي مړښت پروګرام څخه همکاري غوښتل

موږ خپله لومړى دنده دا ټاکلې چې د چينو، څاګانو او کاريزونو اوبو ډېرولو او سيلابونو مخنيوي د ملي اشر لپاره تخنيکي مالومات برابر او تاسې سره يي شريک کړو او هغوى چې پروګرام سره مرسته کوى تر تاسې يې مرستې درورسو.

مرسته کولو او ترلاسي لپاره خپله اړيکه په يادونه يا کامنټ، پېغام او ټليفون کولاى شي. د دغه پروګرام د پرمختګ لپاره په هره ولسوالۍ کې يو کس د پروګرام سفير پکار ده، له هغو ملګرو چې غواړى د پروګرام سفير شي،هيله ده اړيکه وکړي.

هيله ده د ناورينونو د مخنيوي لپاره پروخت لږلږ خوځښت وکړئ، لږترلږه د خپل بام، انګړ او پټيو باراني اوبه کابو کولو سره د ځمکې لاندې د اوبو سرچينو چارج کولو کې مرسته وکړئ. هغوى چې په څاګانو پمپونه لږولي پام مو وي چې د ځمکې لاندې د اوبو سرچينې محدودې دي، لاندې ليکنه کې مې د ځاګانو چارج کولو لپاره تابيا درښودلې، که پام ونکړئ، خداى مه کړه چې اوبه ونلرئ او بيا زما د خبرې ارمان کوئ.

يادونې

د ځمکې لاندې د اوبو سرچينې محدودې دي.

هغه غرونه چې د ښويدو ګواښ ولري هلته دا هڅې مه کوئ.

په پاريس کې د اقليمي بدلونو په هکله کانفرانس COP21 د ډېرو پام ځان ته را اړولاى. اقليمي بدلونونه به په افغانستان، پښتونخوا او سيمه هم دوه ناوړه اغېزې ولري، يوه د وچکاليو او بله د درنو اورښتونو له امله سيلابونه، ددغو دواړو د مخنيوي لپاره مو په هېوادوالو د ملي اشر غږ کړى وو اوس يې يوځل بيا کوو.

نور رحمان لېوال